Fengyuan 的个人资料山在海中照片日志列表更多  |  工具 帮助 |
|
感谢访问！
山在海中11月14日 野��未來無見覺，卜快9個月未來者blog。只段時間，儂家生活底第一要緊其代計就是阿喜其出現，雖然講有仂囝手忙腳亂，但，畢竟是上帝其禮物啊。 今旦 㑚想上只塊寫仂囝關于平話書寫其感言。欲寫儂家平話， 㑚有漢字共羅馬化其平話字兩隻辦法，平話字我前斗有使，就是伊已經斷代幾十年，現今無儂推廣， 雖然儂家其閩東語維基是使平話字寫其，但㑚驚現在全世界也無幾個儂看會會意，無講使伊寫乇了。忖來忖去， 若是寫blog欲吼儂讀， 㑚有使漢字寫。不過若是使漢字，復有蜀隻問題：使福州俗字固是使本字？ 本字固然更更精確，但就是無夠傳統，有仂囝叫儂見覺生分，特別是野夥本字恰復雜，無裝大字符集其電腦根本顯示 𣍐出。儂家福州儂其老祖宗使福州俗字來寫福州話已經幾百年了，者傳統積淀吼我更傾向使伊。其實我前斗幾篇blog也都是使俗字寫其。但將“無”寫作“毛”，將“ 有”寫作“務”，復有粒奇怪。唉哈，對儂家福州話只隻者幾十年來無儂疼，有儂騎其呆命其母語，乜候乍會有像對面岸教育部《臺灣閩南語推薦用字》蜀樣出蜀份《福州閩東語推薦用字》？ 1月17日 我欲計劃閩江行 若講母親河，彼黃河長江儷是閩人其遙遠其玄祖母，正正閩江乍是咱其親生母親。快年看見務儂溯甚乇黃河源長江源，與我離洽遠，我也毛乇興趣，儷是心寒竟毛見儂溯過閩江寫過游記。我其祖先世飲閩江水，若毛親自由閩江源啟程一路下至閩江口五虎礁，我一生之憾事。拍算下蜀兩晝回閩辰侯一定著計劃蜀回由建寧閩江源而下，經沿途各邑遘閩江口其旅程，併記錄沿岸其自然共人文風光，亦不枉為閩人。立誓于此 寫著DQE之後 毛見覺，來美已經伓啻4間月了。也算是過了第一學期，講賣出務甚乇成績，唯一會算欣慰其代計就是過了DQE（doctoral qualifying exam）（官方結果固未出，老闆其小道消息）。雅侈辰侯都是臨時加班，汗顏汗顏……DQE之後是甚乇？伓使講，下底就是無窮無盡其實驗共論文了，慢慢變對研究更用心，伓單單是興趣，更重要其是著總款蜀隻嚴酷其社會，固是著務仂仔本數來立業囇。 1月份，著卓越網懸頂訂了蜀堆書寄來美國，估計月底乍會遘。列蜀隻書單： 更更使錢其就是前兩禮拜訂其Canon SX1。茲款kiák相機自出世以來快是毛著美國銷售，害dpreview懸頂蜀堆美國儂盼星盼月，第一後固著討國外店去買；下兜復是惡評如潮（好評也務，不過彼惡評我看來洽磴目睭）。本來欲想等伊降價遘$550以下再遘ebay上去買，但是著ebay上競拍蜀隻二手SX1未果，só̤起來上網尋著蜀吡澳大利亞網店，加運費使$545買下來，dàng就間間等伊了 |
|||||||||
|
|
