Fengyuan 的个人资料山在海中照片日志列表更多  |  工具 帮助 |
|
12月9日 Ìng-sĕng sū-uôi hòo-sêeuu 人生所谓何事Cuòi sê sióh ciáh dék sêu nè̤ng guăng-cuó gi ông-dà̤, chiĕng-báh nièng ī-lài ī-gĭng ké̤ṳk nè̤ng tō̤-lâung guó chiĕng-báh huòi; cuòi bók-sê sióh ciáh dék ṳ̀ng-ê ké̤ṳk nè̤ng ngê-uông gi ông-dà̤, dióh liù-cūi buăng gi sĕng-uăk dăng-duŏng, bók ô diē-nè̤ng â̤ kó̤ chòng-kī ci-iông dâi-gié?
Nâ ng-sê ĭng-uôi ci-māng-nĭk uôi chók-guók gi dâi-gié dàng-cĭng-ciék-lṳ̆k, iŭ-sĭng-chṳ̆ng-chṳ̆ng, nguāi iā mâ̤ kó̤ sṳ̆-kō̤ ĭng-sĕng gi sū-uôi. Nè̤ng sê chuói-iŏk gi ù-cṳ̄ng, ĭ â̤ uăk â-lì, dăk-dăk sê ĭng-uôi â-dāu ô cĭng-sìng siông gi ciĕ-tì. Ciáh ciĕ-tì kō̤-nèng sê cŭng-gáu, kō̤-nèng sê céng-dê gi kuòng-iĕk, kō̤-nèng sê siá-huôi gi sêng-nêng, dáng-sê dó̤i nguâi lì gōng, dék dṳ̀ng-iéu gi sê ciă gi gă-dìng, bī sié-nó̤h dŭ dṳ̀ng-iéu. Cêu-sáung sĭk-bâi lau, ô muôi-giāng gi uâ, nguāi iā â̤ bà-kī. Có̤i ūi-duâi gi lìng-hùng iā â̤ dióh nâung-nâung gi ăng-lŏk-uŏ diē-sié chó̤i gáu dék buók-sĭk gi kuái-lŏk. 12月6日 Chók-guók gi duôNguāi â̤-báik ci dô̤i duô ék-diâng sê iā káung-nàng, bŭk-guó nguāi bŭk-dáik-bŭk giàng â kó̤. Ô gi siōng-huák sê iù siŏh ciá nè̤ng gi buōng-sáng sū gók-diâng gi, nṳ̄ â̤ bŭk-iù-cê̤ṳ-cuō kó̤ có̤. Kō̤-nèng nguài kák piĕng-cé, mâ̤ ciék-sêu sék-bâi, mâ̤ uŏng-liông bìng-ṳ̀ng. Uôi lau gă-dìng, chĭng-ìng, cé̤ṳ-cŏ̤ng, séng-cié uôi lau ô lĭk-ké kó̤ cīng-giéu sék-mì gi Hók-ciŭ, nguāi iā dióh giăng chók, kó̤ piĕu-iŏng-guó-hāi. Buăk-duō gái bà kī, hiêng-câi gi nguāi ī-gĭng dó̤i chó̤-ciék gāng-gók mà-mŭk, nâ ti-tàu giàng, giàng, giàng... |
|
|
